Lagundu Covid-19 garaian egoera zaurgarrian bizi diren familiei

Pobreziaren eta gizarte-bazterkeriaren aurkako borrokarekin bat egitea, dendak ditugun probintzia bakoitzeko Elikagai Bankuen bitartez. Jasotako ekarpenekin, Elikagai Bankuek janaria erosi eta banatu ahal izango dute COVID-19aren gizarte-krisiaren ondoriorik larrienak pairatu dituzten familia eta gizatalde zaurgarrien artean.

COVID-19 gaitza agertu zenetik, Elikagai Bankuak azkar mugitu behar izan dira beren jarduera egokitzeko eta gizarte-erakundeen elikagai-eskaera gero eta handiago bati erantzuna emateko. Uneko osasun-larrialdiari gizarte arloko larrialdi-egoera gehitu behar diogu, familia askok zailtasunak baitituzte beren oinarrizko premiak asetzeko. Horregatik, Elikagai Bankuak etengabe ari dira lanean, atseden barik eta erlojuaren kontra jardunez, gure inguruko pertsona zaurgarrien elikadurarako eskubidea bermatzeko helburuarekin. EROSKIn Elikagai Bankuen Espainiako Federazioarekin bat egin nahi dugu, gizarte-bazterkerian geratzeko arriskuan dauden gure inguruko familien oinarrizko elikadura- eta higiene-premiak estaltzen laguntzeko.

Elikagai Bankuak irabazi-asmorik gabeko gizarte-erakundeak dira, boluntarioen lanari esker funtzionatzen dutenak. Elikadura-premiak dituzten pertsonen artean janaria banatzea dute helburu eta horretarako, dohaintza-kanpainen bitartez jasotako elikagaiak edo hainbat enpresaren elikagai-soberakinak baliatzen dituzte, elikagaiak alferrik galtzea ekidinez. 

Honako jarduera hauek burutzen dituzte:

• Bankuak berreskuratutako eta jasotako elikagaiak biltegiratzea eta sailkatzea, behar dituzten pertsonen artean banatzeko.
• Pobrezia-egoeran bizi diren familiekin eta gizarte-bazterkerian geratzeko arriskuan dauden gizataldeekin lan egiten duten gizarte-erakundeen artean janaria banatzea.

Elikagai Bankuen Espainiako Federazioa, alegia, Espainiako 54 Elikagai Bankuen jarduera koordinatzen duen 1996an sortutako irabazi-asmorik gabeko erakundea. 2019. urtean, 144,5 milioi kilotik gora banatu ziren 1,1 milioi pertsona txiro eta zaurgarriren artean. Zeregin horretan, ongintzazko 7.200 erakundek eta 3.211 boluntario iraunkorrek hartu zuten parte.

2020an, pandemia dela eta, Espainian zehar 8.053 entitate onuradunekin elkarlanean ari dira, gutxi gorabehera 1,8 milioi pertsona izatera iritsiz.

EROSKIko Zentimo Solidarioak programaren menpeko kanpaina honek elikatzeko laguntza eskainiko die gizarte-bazterkerian geratzeko arriskuan edo pobrezia-egoeran bizi diren eta dendak ditugun probintzia bakoitzeko Elikagai Bankuen laguntza jasotzen duten hainbat familia eta gizatalderi.

Kanpaina honetatik espero den laguntzarekin, kalkulatzen da 377.000 kilo janari lortuko direla 6.000 pertsona elikatzeko bi hilabetez.

Elikagai Bankuen Espainiako Federazioa (webgunea )

Elikagai Bankua - Covid larrialdia (bideoa)