Genero-indarkeriaren biktima izan diren emakume eta haurrei laguntzea, Gurutze Gorria, Fundación Ana Bella eta Fondo de becas Soledad Cazorla/Fundación Mujeres erakundeen bitartez. Bildutako diruarekin, jarraian deskribatutako jarduerak indartu ahal izango dituzte erakunde horiek, emakume eta adingabe gehiagotara iristeko eta zerbitzu egonkorragoak eta iraunkorragoak eskaini ahal izateko.
2021ean genero-indarkeriaren ondorioz eraildako bost emakumetik batek (% 20,9) bakarrik salatu zuen erasotzailea edo laguntza eskatu zuen aldez aurretik. Hori ez egiteko arrazoiak anitzak dira: haiei edo haien seme-alabei zer gertatuko zaienarekiko beldurra, babesa non edo nola lortu jakiteko informaziorik eza edo duten arriskua gutxiestea. Horren ondorioz, tratu txarrak jasotzen dituzten bost emakumetatik batek soilik jasotzen du laguntza; gainerakoak, 1.500.000 emakume baino gehiago, ikusezinak dira, isilpean jarraitzen dutelako. Covid-19ak beste oztopo bat jarri die egoera salatu nahi duten biktimei eta baztertuta utzi ditu laguntza publikoak agortu dituzten emakume langabeak. Era berean, haien seme-alabak etsaitasunezko giro batean bizi dira eta tratu txarren lekuko eta biktima zuzen edo zeharkakoak dira.
Halaber, genero-indarkeriaren ondoriozko hilketa bat dagoenean, biktimaren seme-alabak ahaztuta geratu ohi dira, ikusezin, eta herri-administrazioek ez diete beti kalteak konpontzeko behar adina laguntza ematen. Umezurtzak eta haien familiak babesik gabe geratzen dira maiz, hartu beharreko pausoei buruzko informaziorik eta aholkurik gabe, eta dolurako espaziorik gabe.
Gurutze Gorria, Fundación Ana Bella eta Fondo de Becas Soledad Cazorla irabazi asmorik gabeko erakundeak dira. Batetik, bizirik atera diren emakumeekin modu integralean lan egiten dute, euren burua babesten irakasteko, laguntza emozionala emateko eta, lan duin baten bidez, ahalduntzeko. Bestetik, umezurtzen hezkuntza-garapena babesten eta laguntzen dute.
Horregatik, EROSKIn, erakunde horiekin bat egin nahi dugu, elkarrekin ahal bezain beste emakume eta adingaberi behar duten laguntza eman ahal izateko.
GURUTZE GORRIAk genero-indarkeriaren biktima izan diren emakumeei euren buruak babesten laguntzeko proiektu bat du. Indarkeria-egoeren aurrean arriskuak prebenitzeko eta kudeatzeko plan pertsonalizatuak egiten eta gauzatzen dituzte, besteak beste. Horietan sartzen dira, lehenik eta behin, emakumeei laguntza emozionala emateko ekintzak, beren gaitasunetan konfiantza eta segurtasun pertsonala berreskuratzeko; eta, ondoren, prebentzio neurriei eta euren burua babesteko eta defendatzeko teknikei buruzko prestakuntza praktikoa eskaintzen dute. Halaber, proiektuaren barruan, emakumeei arrisku handieneko eremuetan (haien etxean, adibidez) erabili ahal izateko alerta-elementuak eskuratzen laguntzen zaie.
FUNDACION ANA BELLA erakundearen misioa da emakumeen aurkako indarkeriarik gabeko gizarte berdinzale bat eraikitzea. Horretarako, isiltasuna hausten eta berriz zoriontsu izaten laguntzen die biktimei eta haien seme-alabei eta gogor lan egiten du bizirik atera diren emakumeekin, aldaketa-eragile gisa duten potentziala askatzeko eta enpresekin eta komunikabideekin batera konponbide eraginkorrak sortzeko. AMIGA programak berehala erantzuten die laguntza-eskaerei eta emakume bakoitzaren egoerara egokitzen da. Hauek eskaintzen ditu: aurrez aurreko eta telefono bidezko laguntza emozionala, terapia psikologiko espezializatua eta biktima izandako beste emakume baten akonpainamendua baliabide publikoetara iristeko prozesu osoan zehar, erasotzailearengandik urrun dauden etxebizitzetan bizitzeko fidantza eta alokairuen ordainketa harrera-etxeetatik atera ondoren.
FONDO DE BECAS SOLEDAD CAZORLA/FUNDACIÓN MUJERES erakundearen helburua da genero-indarkeriaren ondorioz umezurtz geratutako haurren garapen pertsonala eta hezkuntza-garapena bultzatzea eta haien ondoan egotea krimenaren ondorengo prozesu osoan zehar, behar duten aholkularitza emanez. Horretarako, Fondo de Becas Soledad Cazorla erakundeak diru-laguntzak ematen ditu adingabeen eskola- eta eskolaz kanpoko gastuak eta laguntza psikologikoa ordaintzeko; aholkularitza juridiko espezializatuko doako zerbitzua eskaintzen du auzi judizial eta administratiboetarako; eta aktiboki parte hartzen du atzemandako arazoen sentsibilizazioan eta ikuspenean, urteko memorien eta hedapen- eta aldarrikapen-jardueren bidez.
EROSKIren Zentimo Solidarioak programaren kanpaina hau genero-indarkeriaren biktima diren emakume eta haurrei lagunduko die eta Gurutze Gorria, Fundación Ana Bella eta Fondo de Becas Soledad Cazorla/Fundación Mujeres erakundeen laguntza- eta aholkularitza-programak indartu eta aktibo mantentzen lagunduko du.
Kanpaina honekin bildu nahi dugun diruarekin, hainbat probintziatako 1577 haur eta emakumeri laguntzea aurreikusten dugu.