Xuntos podemos contribuír a unha mellor nutrición dos nenos e nenas de Siria

O Programa de nutrición de UNICEF en Siria ten os obxectivos de prevención da desnutrición crónica, a lactación materna exclusiva, o tratamento da desnutrición aguda e a suplementación con micronutrientes. Este proxecto de subministracións e servizos esenciais para as nenas, nenos e nais en estado de xestación ou lactación sirias máis vulnerables quere:

• Contribuír a garantir os dereitos humanos das nenas e nenos afectados polo conflito armado en Siria especialmente o dereito á saúde e á supervivencia.
• Mellorar o estado nutricional de nenas e nenos menores de 5 anos e nais en estado de xestación ou lactación na Zona Nordés de Siria e Aleppo.

Máis de oito anos despois do inicio do conflito, a situación de Siria estase convertendo nunha das peores crises humanitarias no mundo. Os nenos e nenas sirias están sendo sometidos a situacións de extrema violencia que impacta directamente na súa supervivencia, desenvolvemento e benestar.

Unha proporción significativa da poboación, estimada en preto de 13 millóns de persoas en situación de necesidade, continúa dependendo da axuda humanitaria para salvar as súas vidas e evitar unha deterioración crítica da súa situación. Estímase que 5,6 millóns de nenas e nenos requiren asistencia humanitaria e 493.000 viven en áreas asediadas ou de difícil acceso.

Un informe de UNICEF mostra que máis do 20% das mulleres embarazadas e en período de lactación presentan desnutrición moderada, e aproximadamente o 5% dos nenos e nenas padecen desnutrición aguda moderada. Máis de 3 millóns de nenos menores de 5 anos requiren apoio nutricional, incluídos case 20.000 nenas e nenos que sofren desnutrición severa aguda.

Zonas como Raqqa, algunhas áreas en Idlib e zonas rurais de Aleppo sofren unha gran prevalencia de desnutrición, a anemia é común entre nenos e nenas e as prácticas para unha alimentación infantil óptima víronse limitadas. Por exemplo, un de cada catro nenos en Idlib ten un crecemento insuficiente para a súa idade.

A cobertura dos servizos de nutrición segue sendo insuficiente debido a que se conta con recursos limitados, que deben ampliarse de xeito inmediato, especialmente para nenos e nenas lactantes e menores de 5 anos así como intervencións relacionadas coa nutrición materna.

O proxecto aolicarase na zona Nordés de Siria e Aleppo, e prestará especial atención ás mulleres embarazadas ou en período de lactación, e aos nenos e nenas menores de 5 anos. Así mesmo, recibirán tamén atención tanto a poboación desprazada pola violencia como as poboacións de acollida.

Con todo, as principais actividades que se levarán a cabo serán as seguintes:

• Identificación das nenas, nenos e mulleres embarazadas ou en período de lactación con desnutrición (nenos e nenas menores de 5 anos con desnutrición aguda e crónica e mulleres embarazadas e en período de lactación con desnutrición aguda): esta fase de identificación non só servirá para diagnosticar e definir o tratamento adecuado para cada caso, senón que tamén axudará a establecer alertas daqueles nenos e nenas que están en risco de sufrir desnutrición se non reciben unha alimentación adecuada.
• Tratamento dos casos diagnosticados como deficiencia de micronutrientes entre as nenas e nenos menores de 5 anos e as mulleres embarazadas ou en período de lactación: as deficiencias de vitaminas e minerais poden dar lugar á desnutrición crónica, que unha vez superados os dous anos é irreversible. Por iso, distribuiranse micronutrientes para atender os nenos e nenas afectados.
• Tratamento dos casos de nenos e nenas diagnosticados con desnutrición aguda grave con alimentos terapéuticos listos para usar e outras subministracións: a dispoñibilidade inmediata destas subministracións é fundamental para garantir a supervivencia destes nenos e nenas posto que sen o tratamento adecuado teñen 9 posibilidades máis de morrer que os que están nunha situación nutricional normal.

Esta campaña de EROSKI contribuirá a atender unha parte dos 3 millóns de nenos e nenas sirias menores de 5 anos que requiren apoio nutricional, incluídos os case 20.000 que sofren desnutrición severa aguda.

UNICEF – Guerra en Siria (web)