A demencia é unha síndrome -xeralmente de natureza crónica ou progresiva-caracterizada pola deterioración da función cognitiva (a capacidade para procesar o pensamento) máis aló do que podería considerarse unha consecuencia do envellecemento normal. Afecta á memoria, ao pensamento, á orientación, á comprensión, ao cálculo, á capacidade de aprendizaxe, á linguaxe e ao xuízo; pero a conciencia non se ve afectada. A deterioración da función cognitiva adoita ir acompañada, e en ocasións é precedida, pola deterioración do control emocional, o comportamento social ou a motivación. Supón a perda da independencia que previamente se tiña para o funcionamento normal no contexto persoal, laboral, familiar e social de quen a sofre.
España está a sufrir un proceso de envellecemento demográfico, e as previsións futuras sinalan un crecemento acelerado do grupo de maiores de 80 anos, o cal nos levará a un "sobreenvellecemento" da poboación que levará a que a taxa de dependencia aumente nos próximos anos. Tendo en conta que a idade é o principal factor de risco na aparición dalgunha demencia, é necesario crear e manter servizos de atención a persoas maiores que melloren a calidade de vida de todo o núcleo familiar.
É necesario traballar para incluír o Alzhéimer na axenda política, buscando o necesario compromiso social e pondo en valor o coñecemento para poder representar e defender os intereses, necesidades e dereitos de todas as persoas que conviven co Alzhéimer.
Nesta campaña colabórase con FAGAL e CEAFA na atención ás persoas con Alzhéimer e os seus familiares.
