Colaborar para proporcionar axuda a persoas con problemas de saúde mental, a través dos proxectos da Fundación ANAR, a Confederación SALUD MENTAL ESPAÑA e Saúde Mental FEAFES Galicia.

A saúde mental é un dos principais desafíos de saúde que existen hoxe en día na nosa sociedade: o 35,6% da poboación española padece algún problema de saúde mental, segundo datos do Informe Anual do Sistema Nacional de Salud 2024.

A infancia e a adolescencia son un colectivo moi vulnerable aos problemas de saúde mental. As dificultades de comunicación, a soidade non desexada, a falta de referentes emocionais e a crecente exposición a situacións de violencia na Internet son factores que contribúen a provocar nos menores ansiedade, depresión, conduta suicida, autolesións e trastornos de conduta alimentaria, entre outros.

Doutra banda, ser muller é un factor de risco no ámbito da saúde mental debido ás desigualdades estruturais na sociedade, xeradoras dunha brecha salarial e maiores dificultades de acceso ao emprego, a recursos e á toma de decisións. Ademais, aínda que as mulleres con problemas de saúde mental teñan necesidades de coidados, en moitos casos son suxeitos activos na prestación de coidados, respondendo a roles tradicionais de xénero, o que obvia o seu propio benestar. A situación agrávase en contextos rurais ou de especial vulnerabilidade, como o senfogarismo ou a migración, facendo imprescindible fomentar o empoderamento, as redes de apoio e a inclusión social en igualdade.

Coas doazóns recibidas, estas organizacións poderán reforzar os proxectos que se describen a continuación.

Fundación ANAR

O proxecto Atención a la salud mental de niños/as y adolescentes a través de las Líneas de Ayuda ANAR facilita aos nenos, nenas e adolescentes un espazo seguro, confidencial e anónimo, no que poidan expresar libremente aquilo que lles ocorre, sentíndose escoitados e respectados por un equipo de profesionais que lles axudará a buscar as mellores alternativas de solución aos seus problemas.

É un servizo gratuíto, de atención 24 horas, 365 días ao ano, que funciona de forma confidencial atendendo os problemas de todos os nenos/as e adolescentes que o necesitan. As peticións de axuda relativas a saúde mental poden ser por diversos motivos relacionados: conduta suicida, autolesións, ansiedade e adiccións, entre outros.

Confederación SALUD MENTAL ESPAÑA

HUB Genera Faenando Futuro é unha plataforma xeradora de redes e propostas de emprendemento e innovación social, para revitalizar o emprendemento de forma proactiva e colaborativa de mulleres con discapacidade psicosocial ou problemas de saúde mental na contorna rural.

A través do traballo en rede, busca crear e escalar solucións a problemas sistémicos ao inspirar, conectar e permitir que entidades e organizacións relacionadas co medio rural, a muller e a discapacidade traballen xuntas en contornas de colaboración e constrúan conxuntamente ecosistemas empresariais e sociais resilientes, creando comunidades de aprendizaxes e saberes, xerando oportunidades a través da arte e a creación e do fomento do emprendemento.

Saúde Mental FEAFES Galicia

O Proxecto Mara consiste no desenvolvemento dun programa de intervención integral dirixido a mulleres cun problema de saúde mental, orientado a mellorar a súa calidade de vida, fomentar a súa autonomía persoal e promover a súa inclusión social e comunitaria. Mediante un enfoque centrado na persoa e con perspectiva de xénero, deseñaranse itinerarios de intervención personalizados para responder ás necesidades específicas de cada participante, tendo en conta a súa situación persoal, social e familiar. 

Para iso, lévanse a cabo sesións de traballo individuais e grupais que inclúen accións de apoio, orientación, asesoramento e formación en diferentes áreas clave: psicoeducación en saúde mental, apoio socio comunitario para participar na contorna e crear redes de apoio, empregabilidade e inserción laboral.  

Esta campaña do programa Céntimos Solidarios de EROSKI colaborará coa Fundación ANAR, a Confederación SALUD MENTAL ESPAÑA e Saúde Mental FEAFES Galicia.

Coa axuda que se espera conseguir con esta campaña, estímase que se proporcionará axuda a 4.053 persoas con problemas de saúde mental.

Fundación ANAR (web da entidade)

Confederación SALUD MENTAL ESPAÑA (web da entidade)

Saúde Mental FEAFES Galicia (web da entidade)