Colaborar para axudar a persoas maiores en situación de vulnerabilidade a través dos proxectos da Federación Alzhéimer Galicia, a Asociación Internacional Teléfono de la Esperanza e o Hospital Sant Joan de Déu Palma - Inca.
O 20,8% da poboación española ten máis de 65 anos (INE, 2024). A soidade e os problemas de saúde teñen maior incidencia en certos grupos da poboación, especialmente no das persoas maiores.
A soidade neste colectivo vese favorecida polo feito de vivir sos, as redes familiares cada vez máis reducidas, os cambios nos modelos familiares en canto ás tarefas de coidado, a perda da parella, o fin do período laboral, a chegada da xubilación, a diminución das relacións sociais, limitacións físicas e de autonomía na vida diaria que lles dificultan participar na súa contorna… Tamén inflúen cambios sociais como os producidos polas tecnoloxías, que aumentaron os fluxos de comunicación, pero facéndoa menos intensa, fluída, cálida e profunda que no contacto persoal.
Segundo a OMS, a soidade non desexada supón un dos maiores riscos para a deterioración da saúde e un factor determinante que favorece a entrada destas persoas en situacións de dependencia. Trátase dunha condición que ten impacto directo na súa saúde física e emocional. A construción e interrelación coas redes de apoio é esencial para romper coas barreiras de illamento que xorden ao redor das persoas maiores. Os programas de voluntariado e os recursos de atención comunitaria deben ampliar os seus ámbitos de actuación e multiplicar os seus esforzos para chegar a un crecente número de poboación exposta a esta situación.
Doutra banda, as demencias como o Alzhéimer teñen unha maior incidencia nas persoas maiores: en España, o 34% das persoas maiores de 85 anos teñen unha demencia, no 60% dos casos é Alzhéimer (Sociedad Española de Neurología, 2024). As demencias conlevan unha gran necesidade de apoio e acompañamento, xa que a deterioración da función cognitiva fai que estas persoas necesiten axuda constante. Aínda que neste caso non estean soas, as consecuencias emocionais para as persoas acompañantes adoitan ser moi significativas, asumindo grandes cambios na súa vida e ter que adaptarse a unha situación dura, inestable e emocionalmente fatigante.
En calquera caso, tanto nos casos de soidade non desexada como nos casos de acompañamento a persoas con demencias, é esencial poder contar cos recursos necesarios para apoiar ás persoas que se atopan nesta situación e, no caso das persoas acompañantes, ofrecerlles tamén ferramentas de apoio.
Coas doazóns recibidas, estas organizacións poderán reforzar os proxectos que se describen a continuación.
Federación Alzhéimer Galicia
A Federación Alzhéimer Galicia busca mellorar a calidade de vida das persoas con Alzhéimer e outras demencias e das persoas coidadoras. Traballan para fortalecer ás asociacións membro e colaboran para xerar cambios na sociedade a favor destas persoas e as súas familias. A idade é o principal factor de risco na aparición dunha demencia, pero non só afecta á persoa que a padece, senón a todo o núcleo familiar, véndose na obriga de capacitarse e adaptarse de forma continua para afrontar unha situación en permanente cambio. A vivencia emocional que provoca a situación de coidados continuos fai imprescindible a creación de soportes de apoio psicolóxico e formación que impidan a aparición do coidador queimado, que é o obxectivo do proxecto Coidados compartidos.
Asociación Internacional Teléfono de la Esperanza
A Asociación Internacional Teléfono de la Esperanza traballa para a promoción da saúde mental das persoas, en especial daquelas que se atopan en situación de crise. Ofrece cobertura a todo o territorio nacional grazas aos seus servizos en liña como son a Orientación para situacións de crises vía telefónica (24h) ou mediante chat. O proxecto SIEMPRE CERCA. Programa de acompañamiento en la soledad no deseada busca ofrecer acompañamento telefónico a persoas en situación de soidade non desexada, preferentemente maiores de 65 anos, realizado por un equipo de persoas voluntarias formadas na intervención en crise e no acompañamento á soidade. O obxectivo non é só acompañar, senón o desenvolvemento de estratexias de enfrontamento, o establecemento de novas redes de apoio e a detección de situacións de risco.
Hospital Sant Joan de Déu Palma - Inca
Os Hospitais Sant Joan de Déu Palma - Inca son centros de referencia autonómica en rehabilitación e xeriatría, recoñecidos pola súa alta especialización e o uso de tecnoloxía avanzada nas súas áreas asistenciais. Neste contexto, o programa T'Acompanyem ten como obxectivo combater a soidade non desexada de persoas maiores en situación de vulnerabilidade familiar ou social durante o seu ingreso hospitalario. Tras recibir a alta, os pacientes reciben un seguimento telefónico nos seus domicilios, cunha frecuencia adaptada ás súas necesidades individuais. Este labor de acompañamento, tanto durante a hospitalización como no seguimento posterior na comunidade, é realizada polo equipo de voluntariado de Sant Joan de Déu. A súa intervención baséase nunha atención centrada na persoa, guiada polos valores fundamentais da organización.
Esta campaña do programa Céntimos Solidarios de EROSKI colaborará coa Federación Alzhéimer Galicia, a Asociación Internacional Teléfono de la Esperanza e o Hospital Sant Joan de Déu Palma - Inca. Coa axuda que se espera conseguir con esta campaña, estímase que haberá un total de 5.360 beneficiarios.
Federación Alzhéimer Galicia (web da entidade)
Asociación Internacional Teléfono de la Esperanza (web da entidade)
Hospital Sant Joan de Déu Palma - Inca (web da entidade)